जळगाव पीपल्स बँकेविरोधात गुन्हा दाखल करण्यासाठी अन्नत्याग उपोषणाचा दुसरा दिवस..
♦️स्वातंत्र्य दिनीही न्यायाची याचना.. पोलिस प्रशासनावर नामुष्की,नागरिकांचा उपोषणकर्त्यांना उत्स्फूर्त पाठिंबा
चोपडा,दि.१५ (प्रतिनिधी) : दी जळगाव पीपल्स को-ऑपरेटिव्ह बँकेच्या फसवणुकीच्या प्रकरणात अद्याप गुन्हा दाखल होत नसल्यामुळे सागर ओतारी यांनी सुरू केलेले आमरण अन्नत्याग उपोषण सलग दुसऱ्या दिवशीही सुरूच आहे. स्वातंत्र्य दिनासारख्या राष्ट्रीय सणाच्या दिवशी नागरिकांना न्यायासाठी उपोषणास बसावे लागणे, हे पोलिस प्रशासनासाठी नामुष्कीचे ठरत असल्याच्या प्रतिक्रिया सर्व सामान्य जनतेमधून उमटत आहेत.
न्याय मिळेपर्यंत लढा सुरू राहील
14 ऑगस्ट 2025 पासून चोपडा शहर पोलीस स्टेशन समोर सुरू झालेल्या या उपोषणाला उपोषणकर्ते सागर काशिनाथ ओतारी यांनी "न्याय मिळेपर्यंत लढा सुरू राहील" असा ठाम निर्धार व्यक्त केला आहे.
नागरिक व कार्यकर्त्यांचा मोठा पाठिंबा
उपोषणाला शिवसेना शिंदे गटाचे पदाधिकारी, चोपडा शहर व तालुक्यातील सर्वपक्षीय नेते, सामाजिक कार्यकर्ते, विविध सामाजिक संघटना आणि नागरिकांचा मोठा पाठिंबा मिळत आहे. उपोषण स्थळी कार्यकर्त्यांची रिघ लागली आहे तरी देखील उपोषण लोकशाही मार्गाने शांततापूर्ण वातावरणात सुरु आहे.
मा. उच्च न्यायालयाने बँकेची याचिका फेटाळल्याने गुन्हा दाखल करण्याचा मार्ग मोकळा
दि. 26 एप्रिल 2025 रोजी चोपडा शहर पोलीस स्टेशन ला दाखल केलेल्या फसवणुकीच्या तक्रारीवर अद्याप गुन्हा नोंदविला गेलेला नाही. सदर फिर्याद दाखल होऊ नये म्हणून बँकेने मा. उच्च न्यायालयाच्या औरंगाबाद खंडपीठात रिट पिटीशन क्र. 798/2025 दाखल केली होती. त्यावर दि. 24 जून 2025 रोजी मा. उच्च न्यायालयात सुनावणी झाली, त्यावेळी मा. उच्च न्यायालयाने बँकेचा अर्ज फेटाळल्याचे सांगितले असता बँकेतर्फे वरिष्ठ ऍड. एस बी देशपांडे व ऍड तपन संत यांनी याचिका मागे घेत असल्याचे मा. उच्च न्यायालयास सांगितले. तरी देखील पोलिसांनी गुन्हा नोंदविला नसल्याने पोलिस प्रशासनावर गंभीर आरोप होत आहेत. यामुळे बँकेला पाठीशी घालून सर्वसामान्य जनतेला न्यायापासून वंचित ठेवल्याचा निषेध व्यक्त होत आहे.
तपास अधिकाऱ्यांचा प्रस्ताव रखडला
सदर प्रकरणातील तपास अधिकारी आणि चोपडा शहर पोलीस स्टेशनचे पोलीस निरीक्षक यांनी सदर प्रकरणी तपास पूर्ण करून मा. उपविभागीय पोलीस अधिकाऱ्यांकडे बँकेविरुद्ध गुन्हा दाखल करण्यासाठी वारंवार लेखी परवानगी मागितली असल्याचे समजते. मात्र उपविभागीय पोलीस अधिकारी यांनी अद्यापही परवानगी दिलेली नसल्याने संबंधितांच्या भूमिकेवर तक्रारदार यांनी शंका व्यक्त केली आहे
उपोषणकर्त्यांच्या मागण्या
संबंधित आरोपींवर तात्काळ गुन्हा नोंदवून अटक करावी.अन्यायाला पाठबळ देणाऱ्या व जळगाव पीपल्स बँकेला पाठीशी घालणाऱ्या अधिकारी व जबाबदारांची चौकशी करावीअशी मागणी उपोषणकर्त्यांकडून करण्यात आली आहे
निषेधाची लाट
स्वातंत्र्य दिनीही सुरू असलेल्या या उपोषणामुळे पोलिस प्रशासनावर रोष व्यक्त करणाऱ्यांची संख्या वाढत आहे. "न्याय मिळेपर्यंत लढा सुरू राहील".असे उपोषणकर्ते यांचे म्हणणे आहे.