आजी आजोबांनी ठेवलेल्या नावाप्रमाणेच "प्रेरणाची" प्रेरणादायी भरारी..
♦️चारच महिन्यात दोन सरकारी नोकरी मिळाल्याने बाविस्कर परिवारात आनंद..
चोपडा दि.२७(प्रतिनिधी):-तालुक्यातील गोरगावले बुद्रुकचे माजी सरपंच श्री.व सौ.आशाबाई जगन्नाथ बाविस्कर यांची पुतणी कु. प्रेरणा हिने सन २०२४ मध्ये झालेल्या जलसंपदा विभागाच्या सरळसेवा भरती परीक्षेत नाशिक विभागातून मुलींमधून प्रथम क्रमांकाने उत्तीर्ण होण्याचा मान मिळविला होता. सध्या ती चोपडा येथील निम्न तापी पुनर्वसन विभागात सहाय्यक सिव्हिल अभियंता ह्या पदावर कार्यरत आहे. पुन्हा सन २०२५ मध्ये नगररचना (टाऊन प्लॅनिंग) विभागातील वर्ग-२ च्या अधिकारी पदासाठी झालेल्या परिक्षेत राज्यातून मुलींमधून प्रथम क्रमांकाने उत्तीर्ण होण्याचा मान मिळवला आहे. विशेष म्हणजे दोन्ही परीक्षांमध्ये त्या प्रवर्गात मुलींसाठी एकेकच जागा होती. तिचे आजोबा कोळंबा जि.प.शाळेचे आदर्श मुख्याध्यापक स्व.तुळशीराम कामाजी बाविस्कर व आजी श्रीमती.जावित्रीबाई तु.बाविस्कर यांनी तिच्या जन्माच्या वेळी तिचे नाव प्रेरणा ठेवले होते. तिने त्या नावाचे सार्थक करून बाविस्कर परिवारासाठी प्रेरणादायी भरारी घेतलेली आहे.
कु. प्रेरणा ही गोरगावले माध्य.विद्यालयाचे संचालक प्रेमनाथ बाविस्कर व चोपडा येथील म.गांधी प्राथ. विद्यालयाच्या प्राथ. शिक्षिका सौ. सुरेखाबाई बाविस्कर यांची मुलगी आहे. तिने पूर्व प्राथ. शिक्षण चोपडा येथील मिमोसा स्कूल येथे घेतले असून तिचे प्राथमिक, माध्यमिक व उच्च माध्य.शिक्षण पंकज विद्यालय चोपडा येथे झालेले आहे. नाशिक येथे आयआयटीचा अभ्यास करून शिरपूरच्या आर.सी.पटेल महाविद्यालयात बी.ई. सिव्हिलचे शिक्षण घेऊन बी.टेक.ची परिक्षा प्रथम श्रेणीत उत्तीर्ण केलेली आहे. मध्यंतरीच्या काळात ती घरीच रात्रंदिवस अभ्यास करीत राहिली. आधी जलसंपदा विभागात व आता नगररचना विभागात वर्ग-२ चे अधिकारी होण्याचा मान तिने मिळवला आहे. तिच्या ह्या यशात परिवारातील सर्व सदस्यांचे सहकार्य व गुरुजनांचे मार्गदर्शन मिळाले, असे ती सांगते. यापुढेही स्पर्धा परीक्षांचा अभ्यास सुरू ठेवणार असून वर्ग-१ चे अधिकारी होण्याचा तिचा संकल्प आहे.
तिच्या ह्या यशाबद्दल चोपडा व जळगाव कोळी समाज बहुउद्देशीय प्रतिष्ठान तर्फे आयोजित कार्यक्रमात तिचा यथोचित सत्कार करण्यात आला. याप्रसंगी जळगाव मनपाचे माजी नगराध्यक्ष चत्रभुज सोनवणे, माजी डीवायएसपी छगनराव देवराज, ज्येष्ठ समाजसेवक लखिचंद बाविस्कर, सौ. कस्तुराबाई बाविस्कर, रंगराव देवराज, शांताराम सपकाळे, गोकुळ सूर्यवंशी, अनिल कोळी, भरत बाविस्कर, संजय बाविस्कर, रवींद्र कोळी, आनंद कोळी, गणेश बाविस्कर, सुधाकर बाविस्कर, मधुसूदन बाविस्कर, रतन बिराडे, माधव देवराज, गोपाल कोळी, संतोष देवराज, भागवत कोळी, सुभाष रायसिंग, देविदास देवराज, नवल कोळी, अनिल बाविस्कर, भरत पाटील, मोतीलाल रायसिंग, भाईदास कोळी, सुकलाल कोळी, प्रकाश सपकाळे, प्रवीण कोळी, प्रेमनाथ बाविस्कर, योगेश बाविस्कर, भाऊसाहेब बाविस्कर, हिरालाल ठाकरे, वसंत कोळी, सुधाकर कोळी, आधार कोळी, किशोर देवराज, लीलाधर बाविस्कर, संतोष कोळी, गुलाब कोळी यांचेसह समाजबांधव मोठ्या संख्येने उपस्थित होते.