वकील व जज्जांच्या घरी डल्ला मारणाऱ्या सराईत अट्टल चोरास चोपडा शहर पोलिसांनी अडविले हतकडीत.. देशमुख नगरातील चोरी उघडकीस.. १लाखाचा मुद्देमाल हस्तगत
चोपडा दि.१५(प्रतिनिधी) वकील व जज्ज यांच्या घरीही सोन्याच्या वस्तूंवर डल्ला मारणारा सराईत अट्टल चोरास चोपडा शहर पोलिसांनी मोठ्या शिताफीने अटक करून जेलची हवा दाखवली आहे. त्याच्याकडून जवळपास एक लाख पाच हजारांचा मुद्देमाल हस्तगत करण्यात आला आहे. या भामट्याचे नाव प्रकाश विजय पावरा (वय 28 ,रा. तोरणमाळ तालुका- धडगाव, जिल्हा नंदुरबार) असे असून त्याने गेल्या पंधरा दिवसापूर्वी चोपड्यातील देशमुख नगरात घरफोडी करून दागिने व मोबाईल लंपास केला होता. मोबाईलची तांत्रिक माहिती घेत पोलिसांनी त्यास हुडकून काढत पोलीस जाळ्यात अडकवले आहे. याआधी त्याच्यावर दोंडाईचा पोलिसात दहा ते बारा घरपोडीचे गुन्हे दाखल असल्याची माहिती उघड झाली आहे चोपडा पोलिसांच्या या कारवाईचे नागरिकांनी जोरदार कौतुक केले आहे.
याबाबत पोलीस प्राप्त अधिक माहिती अशी की,चोपडा शहरातील सेवानिवृत्त नागरीक विजय नारायण बाविस्कर (वय ६९ वर्ष, राहणार देशमुख नगर, यावल रोड, चोपडा )यांचे राहते घरी दिनांक २९/०९/२०२५ च्या रात्रीच्या सुमारास कोणीतरी अज्ञात इसमाने घरफोडी करुन घरातील सोन्याचे दागिने व मोबाईल फोन चोरी केला होता. त्याबाबत चोपडा शहर पोलीस स्टेशन येथे गु.र.नं. ५५२/२०२५ भा.न्या.सं. कलम ३३०(२), ३३१, ३३१ (४), ३०५ (अ) अन्वये गुन्हा दाखल करुन तपास जोमाने सुरू करण्यात आला होता.गुन्हयातील अज्ञात आरोपीचा शोध घेत असताना चोरीस गेलेल्या मोबाईल फोनच्या तांत्रिक माहितीच्या आधारे चोपडा शहर पोलीस स्टेशनचे पोउपनि चेतन परदेशी व पथकाने दोन ते तीन दिवस शिरपुर परिसरात सापळा लावून आरोपीचा शोध घेत शिरपुरातुन अटक केली.तपासाअंती आरोपीचे नाव नामे प्रकाश विजय पावरा, वय २८ वर्ष, रा.तोरणमाळ, ता.धडगाव, जि. नंदुरबार याने सदर गुन्हा केल्याचे निष्पन्न झाले.
वकील व न्यायाधीशांचे घरीही चोरी..10घरफोड्यांचा गुन्हा दाखल
सदर आरोपी हा घरफोड्या व चोरी करणारा सराईत आरोपी असुन त्याचेवर यापूर्वी शहादा पोलीस स्टेशन व दोंडाईचा पोलीस स्टेशन येथे १० ते १२ घरफोडीचे गुन्हे दाखल आहेत. दोंडाईचा येथे एका वकीलाचे घर फोडून चोरी केली होती. तसेच शहादा येथील कोर्टाचे तत्कालीन न्यायाधिश यांच्या शासकीय निवासस्थानी देखील त्याने घरफोडी केली होती. सदर गुन्हयांमध्ये त्याला पुर्वी अटक देखील करण्यात आलेली आहे.
लाखांचा मुद्देमाल जप्त
नमुद आरोपी कडून कौशल्यपुर्वक तपास करुन चोपडा येथील घरफोडी मधील खालील नमुद मुद्देमाल शिरपुर येथुन हस्तगत करण्यात आला आहे.त्यात १००००/- रुपये किंमतीच्या २ सोन्याच्या अंगठ्या व २ बेन्टेक्सच्या नकली अंगठया तसेच २००००/- रुपये किंमतीची सोन्याची गळ्यातील साखळी गोप सारखी दिसणारी त्यात M इंग्रजी अक्षर षटकोणाकृती आकाराची ,३०००/- रुपये किंमतीचा टेक्नोस्पार्क गो कंपनीचा अँड्राइड मोबाईल त्यात जिवो कंपनीची सिम आणि १००००/- रु. किंमतीची ३ ग्रॅम सोन्याच्या गोल रींगा (बाळया), १०००/- रु. किंमतीची ३ भार वजनाचे चांदीची गळयातील चैन,७००/- रु. किंमतीची २ भार वजनाचे पायातील पैंजण,६००००/- रु. किंमतीची यमाहा कंपनीची YBR ११० हि दुचाकी वाहन( क्र. MH १८ AF ९५८२.) असा एकुण १लाख ४ हजार ७००/- रुपये किंमतीचा ऐवज जप्त करण्यात आला आहे.यातील काही मुद्देमाल हा चोपडा येथे जुन महिन्यात झालेल्या घरफोडीच्या अनुषंगाने दाखल असलेल्या गुन्ह्यातील असल्याचे निष्पन्न झाले आहे.
चोरीचे दागिने आढळले शेतात
सदरचे दागिने हे आरोपीने वाघबडली, ता.शिरपुर, जि. धुळे शिवारात एका शेतामध्ये यमाहा YBR११० या मोटारसायकल मध्ये लपवुन ठेवले होते. त्यामुळे सदर मोटारसायकल तेथुन जप्त करण्यात आली आहे. अशाप्रकारे चोपडा शहर पोलीस स्टेशन येथे दाखल असलेले २ घर फोडीचे गुन्हे उघडकीस आलेले आहे.
यांनी केली धडक कारवाई
सदर कामगिरी ही जळगाव पोलीस अधिक्षक श्री. महेश्वर रेड्डी, चाळीसगाव परीमंडळ अपर पोलीस अधिक्षक श्रीमती कविता नेरकर,चोपडा उपविभागीय पोलीस अधिकारी श्री. अण्णासाहेब घोलप यांचे मार्गदर्शनाखाली चोपडा शहर पोलीस स्टेशनचे पोलीस निरीक्षक मधुकर साळवे, सपोनि एकनाथ भिसे, पोउपनि चेतन परदेशी, पोहेकॉ ज्ञानेश्वर जवागे, पोकॉ मदन पावरा, पोकॉ अजिंक्य माळी,पोकॉ योगेश पाटील, पोकॉ विलास पारधी यांनी पार पाडली. गुन्हयाचा पुढील तपास पोउपनि चेतन परदेशी हे करीत आहेत.