*पहाण येथील ४६ वर्षीय शेतकरी अज्ञात क्रुझरच्या धडकेत ठार.....!
पाचोरा दि.१८( प्रतिनिधी राजेंद्र खैरनार) तालुक्यातील पहाण गावातील ४६ वर्षीय शेतक-यास भडगाव स्ट्रीट हायवेवरील हॉटेल भाग्यलक्ष्मी गार्डनजवळ अज्ञात क्रुझर ने धडक दिल्याने शेतकऱ्याचा जागीच करुण अंत... झाल्याची घटना आज रोजी घडली असून या घटनेप्रकरणी अज्ञात क्रुझर चालका विरुध्द पाचोरा पोलिस स्टेशन मध्ये गुन्हा नोंदविण्यात आला आहे.
याबाबत सविस्तर वृत्त असे की, पहाण ता. पाचोरा येथील शेतकरी प्रमोद दत्तु पाटील (वय - ४६) हे आज शनिवार, दि. १८ जून रोजी सकाळी मोटरसायकलने चाळीसगाव येथे बैलजोडी बघण्यासाठी गेले होते. दरम्यान चाळीसगाव कडुन पाचोऱ्याकडे येत असतांना हॉटेल भाग्यलक्ष्मी गार्डन समोरील पेट्रोल पंपा वर पेट्रोल भरुन निघाले असता पाचोऱ्याकडून भडगाव कडे गतीने भरधाव वेगाने जाणाऱ्या अज्ञात क्रुझरने त्यांच्या मोटरसायकलला जोरदार धडक दिल्याने प्रमोद पाटील हे खाली पडून त्यांच्या डोक्याला जबर मार लागल्याने ते जागीच मरण पावले.
प्रमोद पाटील यांना तात्काळ रुग्णवाहिका चालक बबलू मराठे यांनी पाचोरा ग्रामीण रुग्णालयात दाखल केले असता वैद्यकीय अधिकारी डॉ. अमित साळुंखे यांनी प्रमोद पाटील यांना मृत घोषित केल्यानंतर शवविच्छेदन केले. घटनेप्रकरणी पाचोरा पोलिसात अज्ञात क्रुझर चालकाविरुध्द गुन्हा नोंदविण्यात आला आहे.
मयत प्रमोद पाटील यांच्या मागे वृद्ध आई, वडिल, पत्नी, एक भाऊ, एक बहिण, एक मुलगा, एक मुलगी असा परिवार आहे. अतिशय गोड मितभाषी मनमिळाऊ व हसमुख स्वभावाचे प्रमोद पाटील यांच्या अचानक निधनाने पहाण गावासह पंचक्रोशीत शोककळा पसरली आहे.....