*लाच बहाद्दरांवर जोरदार कारवाया..! बोदवडचे तहसीलदार अडकले.. तलाठी,चालक व खाजगी पंटरही जाळ्यात.. अवैध वाळू वाहतूक डंपर मालकाने लाच देतांना केलें "एप्रिल फुल".. महसूल अधिकाऱ्यांची मात्र बत्ती "गूल "*
बोदवड दि.०१ एप्रिल (प्रतिनिधी)
बोदवड तहसीलदारांसह चौघांना आठ हजारांची लाच घेताना जळगाव एसीबीच्या पथकाने रंगेहाथ अटक केल्याने लाचखोरांच्या गोटात प्रचंड खळबळ उडाली आहे. बोदवड तहसीलदार योगेश टोणपे यांच्यासह त्यांचा वाहन चालक, तलाठी व एका खाजगी पंटराचा आरोपींमध्ये समावेश आहे.
बोदवड तहसीलदारांनी अवैधरीत्या वाळू वाहतूक चालू देण्यासाठी तसेच तक्रारदाराच्या डंपरवर कारवाई न करण्यासाठी यापूर्वी 24 हजार रुपये घेतले होते तर उर्वरीत पाच हजार रुपये तहसीलदार व चालकांसाठी तर दरमहा प्रमाणे तलाठ्याने तीन हजारांची मागणी केल्याने वाळू वाहतूक करणाऱ्या व्यावसायीकाने एसीबीकडे तक्रार नोंदवली. जळगाव एसीबीचे पोलिस उपअधीक्षक शशीकांत पाटील, पोलिस निरीक्षक संजोग बच्छाव व कर्मचाऱ्यांनी सापळा रचला. सुरूवातीला खाजगी पंटराने लाच रक्कम स्वीकारली व नंतर त्याच्यासह तहसीलदार, तलाठी व चालकाच्या मुसक्या आवळण्यात आल्या.
तक्रारदार यांचा वाळू वाहतूकीचा व्यवसाय आहे.अवैधरित्या वाळूची वाहतूक सुरू ठेवण्यासाठी अतिरिक्त पैश्यांची मागणी केली जात असल्याचे समोर आले आहे. वाळूची वाहतूक सुरू ठेवण्यासाठी आठ हजाराची मागणी केली होती.त्यानुसार तक्रारदार यांनी जळगाव लाचलुचपत विभागाकडे तक्रार दिली होती. तक्रारीची
पडताळणीसाठी जळगावच्या लाचलुचपत विभागाने आज सापळा रचला होता. यावेळी बोदवडचे तहसीलदार योगेश टोणपे यांच्यासह तलाठी,त्यांचा वाहन चालक आणि एका खासगी पंटरला जळगावच्या लाचलुचपत विभागाच्या पथकाने आठ हजाराची लाच घेतांना रंगेहात पकडले आहे.या कारवाईमुळे महसूल विभागात प्रचंड खळबळ उडाली आहे .