अदखलपात्र गुन्ह्यातील चॅप्टर केस मधून दोन्ही मुलांची नावे कमी करण्यासाठी हवालदाराने घेतली १५ हजाराची लाच
म्हसावद ता.शहादा दि.२५ (प्रतिनिधी):
मोलगी ता . अक्कलकुवा येथे चॅप्टर केस संदर्भात 11 हजार रुपयांची लाच घेताना मोलगी पोलिस ठाण्यातील पोलीस हवालदार रंगेहात पकडला गेला . यामुळे पोलीस दलात खळबळ उडाली आहे .
याबाबत अधिक माहिती अशी की, लाचलुचपत प्रतिबंधक विभागाने दिलेल्या माहितीनुसार एक व्यक्ती आणि त्याची दोन्ही मुले यांच्यावर जमिनीच्या वादातून अदखलपात्र गुन्हा दाखल आहे . या अदखलपात्र गुन्ह्यातील चॅप्टर केस मधून दोन्ही मुलांची नावे कमी करण्यासाठी मोलगी पोलीस ठाण्यातील पोलीस हवालदार प्रकाश सिताराम मेढे ( वय 43 वर्ष ) यांनी त्या व्यक्तीकडे 15,000 रुपये लाचेची मागणी केली . याविषयी लाचलुचपत प्रतिबंधक विभागाकडे या व्यक्तीने तक्रार दिली . दखल घेऊन लाचलुचपत प्रतिबंधक विभागाच्या पथकाने आज दि.25 नोव्हेंबर रोजी दुपारी सापळा रचला . त्यावेळी तडजोडीअंती 11 हजार रुपये पंचासमोर हवालदार मेढे यांनी स्वीकारले . म्हणून लगेचच पकडून गुन्हा दाखल करण्याची प्रक्रिया सुरू करण्यात आली . लाचलुचपत प्रतिबंधक विभागाचे पोलीस अधीक्षक सुनील कडासने ( नाशिक परिक्षेत्र , नाशिक ) , अप्पर पोलीस अधीक्षक सतीश भामरे , ( अति कार्यभार ) व पोलीस उपअधीक्षक , धुळे ( अति . कार्यभार नंदुरबार ) सुनील कुराडे यांच्या मार्गदर्शनाखाली लाचलुचपत प्रतिबंधक विभागाच्या पोलीस निरीक्षक माधवी समाधान वाघ यांनी हवालदार उत्तम महाजन , विजय ठाकरे , नायक दिपक चित्ते , अमोल मराठे , महिला पोलीस नायक ज्योती पाटील या पथका समवेत कारवाई केली .
आज दि. 25 नोव्हेंबर रोजी सायंकाळी उशिरापर्यंत ही कारवाई चालू होती .