अवैध वाळू वाहतूकदारांची मुजोरी पोलिसांशी हुज्जत..७ जणांवर गुन्हा
चोपडा,दि.२१(प्रतिनिधी) तालुक्यात तापी नदीच्या पात्रातून विनापरवाना वाळूचे उत्खनन करून तिची अवैध वाहतूक करणाऱ्यांवर कारवाई करणाऱ्या चोपडा ग्रामीण पोलिसांच्या पथकाशी हुज्जत घालून शासकीय कामात अडथळा आणल्याची धक्कादायक घटना घडली. आरोपींनी पोलिसांना धक्काबुक्की करत पकडलेली वाहने (डंपर व ट्रॅक्टर) बळजबरीने पळवून नेली असून याप्रकरणी ७ जणांविरुद्ध गुन्हा दाखल करण्यात आला आहे.
याबाबत पोलीस सुत्रांकडून मिळालेल्या माहितीनुसार,२१ सप्टेंबर २०२६ रोजी पहाटे सुमारे ०४:३० वाजेच्या सुमारास निमगव्हाण ते दोंदवाडे रोडवर तापी नदीच्या पात्रातून विनापरवाना वाळूची अवैध वाहतूक केली जात असल्याची माहिती पोलिसांना मिळाली. चोपडा ग्रामीण पोलीस स्टेशनचे पोलीस अंमलदार आत्माराम रामसिंग अहिरराव हे पथकासह तेथे कारवाईसाठी गेले असता निळ्या रंगाच्या ट्रॅक्टर व डंपरमधून बेकायदेशीर वाळू वाहतूक सुरू असल्याचे आढळले.जेव्हा पोलीस कर्मचारी ही वाहने जप्त करून चोपडा ग्रामीण पोलीस ठाण्यात जमा करण्यासाठी घेऊन येत होते, तेव्हा वाहनांचे मालक, चालक व क्लिनर यांनी एकत्र येत पोलिसांना विरोध केला. त्यांनी शासकीय कामात अडथळा निर्माण करून वाद घातला आणि पोलिसांना धक्काबुक्की करत जप्त केलेले डंपर व ट्रॅक्टर तेथून पळवून नेले.याप्रकरणी पोलीस अंमलदार आत्माराम अहिरराव यांच्या फिर्यादीवरून चोपडा ग्रामीण पोलीस ठाण्यात पुढील आरोपींवर गुन्हा दाखल करण्यात आला आहे:
यात दीपक शालिक पाटील (रा. पातोंडा, ता. अमळनेर – डंपर चालक) हर्षल राजेंद्र धनगर (रा. तांदलवाडी, ता. चोपडा – क्लिनर),निखिल संतोष चौधरी (रा. भोईवाडा, अमळनेर – डंपर चालक) रोहित गुलाब देसले (रा. त्रिवेणी बगीचा, अमळनेर – क्लिनर),राज जैन (रा. सुभाष चौक, अमळनेर – डंपर मालक),सुनिल भोई (रा. भोईवाडा, ता. अमळनेर – डंपर मालक), देवेंद्र कोळी (रा. तांदलवाडी, ता. चोपडा) यांच्यावर गुन्हा नोंदविण्यात आला आहे.
सदर घटनेप्रकरणी भारतीय न्याय संहिता (BNS) कलम ३०३(२), १८९(२), ११५(२), १३२ आणि महाराष्ट्र जमीन महसूल संहिता कलम ४८(७), ४८(८) अंतर्गत गुन्हा नोंदवण्यात आला आहे.ग्रामीणचे पोलीस निरीक्षक संजय सोनवणे यांच्या मार्गदर्शनाखाली या प्रकरणाचा पुढील तपास सुरू आहे.