जिल्हा परिषद शाळा वरगव्हाण येथे शाळापूर्व तयारी मेळावा उत्साहात
चोपडा दि.१६(प्रतिनिधी) : १५ जून शाळेचा पहिला दिवस. मनात नवी आशा, नवी आकांक्षा, नवी स्वप्ने घेऊन चिमुकल्यांच्या चिवचिवाटासह जि.प.प्रा.शाळा वरगव्हाण गजबजून गेली. शाळेचा कोपरा न् कोपरा बालकांच्या सहवासाने प्रफुल्लित होऊन गाऊ लागला... "ही आवडते मज मनापासूनी शाळा, लाविते लळा ही जशी माऊली बाळा. "
दरवर्षाप्रमाणे या वर्षीही पहिलीत दाखल होणा-या मुलांची वाजतगाजत चारचाकी गाडी मिरवणूक काढण्यात आली. शैक्षणिक घोषणांनी परिसर दणाणून गेला, शाळेत येणा-या प्रत्येक बालकांच्या चेह-यावर शाळा उघडण्याचा आनंद ओसंडून वाहत होता. मिरवणूकीनंतर शाळेच्या पटांगणात शाळापूर्व तयारी मेळाव्याचे आयोजन करण्यात आले. मेळाव्यात विविध स्टॉलची मांडणी करण्यात आली होती यात शारीरिक विकास, भाषा विकास,बौद्धिक विकास, सामाजिक विकास इ. स्टॉलची मांडणी केली. या मेळाव्यात पहिलीत दाखल होणाऱ्या 25 विद्यार्थ्यांनी व त्यांच्या पालकांनी सहभाग नोंदवला. विद्यार्थ्याला शाळेत येण्यापूर्वी शाळेविषयी गोडी निर्माण व्हावी, विद्यार्थ्यांचा सर्वांगीण विकासाचा पाया घातला जावा यासाठी या मेळाव्याचे आयोजन करण्यात आलेले असते.यावेळी विद्यार्थ्यांना मोफत पाठ्यपुस्तकांचे व गणवेशाचे वाटप करण्यात आले. पुष्पगुच्छ व पेढे वाटून विद्यार्थ्यांचे स्वागत करण्यात आले.
मेळाव्यासोबत शाळेचे ग्रेडेड मुख्याध्यापक श्री. केदारेश्वर चव्हाण सर,गावचे पोलीस पाटील श्री नानासो गोरख पाटील व अंगणवाडी मदतनीस श्रीमती निर्मला पाटील यांचा सेवापुर्ती सोहळा पार पडला श्री. केदारेश्वर चव्हाण सर हे ३३ वर्ष शिक्षण क्षेत्रात प्रदिर्घ काळ व्यथित केला, त्यांचा सत्कार श्री.नेमिचंद आप्पा सोनार यांच्या हस्ते करण्यात आला. तसेच वरगव्हाण गावाचे पोलिस पाटील श्री. नानासो गोरख पाटील यांनी देखिल अनेक वर्ष गावाची सेवा करत अनेक सामाजिक कार्य करून गावाचे नावलौकिक मिळवला. त्यांचा सत्कार श्री. जयसिंग तात्या पाटील यांच्या हस्ते करण्यात आला. त्याचबरोबर अंगणवाडी मदतनीस श्रीम.निर्मलाबाई पाटील यांचा सन्मान श्रीम. हाफिजा तडवी यांच्या हस्ते करण्यात आला. सेवापूर्ती निमित्त शाळेच्या वतीने तिन्ही मान्यवरांना विठूरूखमाईची मुर्ती भेट म्हणून देण्यात आली. तसेच मा. सरपंच श्री भुषण पाटील व ग्रामपंचायत सदस्य श्री रविंद्र पाटील,श्री जहांगीर तडवी, यांनी ग्रामपंचायतीच्या वतीने देखील तिन्ही ही मान्यवरांचा सत्कार करण्यात आला. सामाजिक कार्यकर्ते श्री गजानन पाटील यांनी देखिल छत्रपती शिवाजी महाराज यांची प्रतिमा देऊन त्यांचा सत्कार केला. तसेच नवीन रूजू झालेल्या श्री संदिप निकम सर यांचे देखिल स्वागत करण्यात आले.
शाळापूर्व तयारी मेळाव्यास शा. व्य. स. अध्यक्षा श्रीम. हाफिजा तडवी, उपाध्यक्ष श्री. मुजात तडवी, सदस्य श्री. लतीब तडवी , श्री दिनेश सोनार, श्री निसार तडवी, श्री. संजय तडवी, श्री. तय्यब तडवी आदि उपस्थित होते. कार्यक्रमाचे सूत्रसंचालन श्री शरीफ तडवी सर यांनी केले व आभार प्रदर्शन मुख्याध्यापिका श्रीम. मंगला पाटील यांनी मानले.