आमदार सौ.लताताई सोनवणे यांच्या कारला भीषण अपघात....चौघे किरकोळ जखमी..गौण खनिज वाहतूक डंम्पर चालक पसार..मालक निघाला मेहरुणचा.. पोलिस पथके रवाना
जळगाव,दि.२८(प्रतिनिधी ): गौण खनिजाची वाहतूक करणार्‍या भरधाव डंपरने चोपडा विधानसभा मतदार संघाच्या आमदार लता सोनवणे यांच्या कारला जबर धडक दिल्याची घटना शनिवारी करंज गावाजवळ शनिवारी रात्री घडली. या अपघातात आमदारांसह चौघे किरकोळ जखमी झाले आहेत. या प्रकरणी रात्री उशिरा अज्ञात डंपर चालकाविरुद्ध जळगाव तालुका पोलिसात गुन्हा दाखल करण्यात आला.अपघातानंतर डंपर चालक पसार झाला असून त्याचे नाव चेतन असल्याचे समजते.डम्पर मालक मेहरुण परिसरातील असल्याचे निष्पन्न झाले असून आडनाव वंजारी असल्याची माहिती समोर आली आहे.पोलिस तपास चक्रे वेगाने फिरत असून चालकास कोणत्याही क्षणी अटक होण्याची शक्यता आहे.
काल शनिवारी संध्याकाळी सात वाजता कुरवेल ते तावसा या रस्त्याचे आमदार लता सोनवणे यांच्याहस्ते भूमिपूजन होते. तो कार्यक्रम आटोपून आमदार सोनवणे यांच्यासह त्यांचे पती चंद्रकांत सोनवणे हे रात्री आपल्या इनोव्हा कार (एम.एच. 19 बी.यू. 0999) ले चोपड्याकडून जळगावकडे येत असताना रात्री पावणे नऊ वाजेच्या सुमारास तालुक्यातील करंज गावाजवळ जळगावकडून चोपड्याकडे जाणार्‍या भरधाव डंपर (क्र.एम.एच.19 झेड 6245) ने आमदार लता सोनवणे यांच्या वाहनाला जबर धडक दिली. या धडकेत इनोव्हा वाहनाचा पुढील भागाचा पूर्णपणे चुराडा झाला. तर आमदार लता सोनवणे, माजी आमदार प्रा. चंद्रकांत सोनवणे, अंगरक्षक पोलीस नाईक अमित पिजांरी आणि चालक दीपक पवार हे जखमी झालेत. सर्व जखमींना खाजगी रुग्णालयात उपचारार्थ हलवण्यात आले. अपघातानंतर डंपर चालक वाहन सोडून पसार झाला.
डंपर चालकाला अटक करण्यासाठी पथक रवाना झाले आहे.चालक दीपक सुभाष पवार यांच्या फिर्यादीवरून डंपर चालकाविरुद्ध जळगाव तालुका पोलिसात गुरनं १४५/२०२३भादंवि कलम २७९,३३७, मोटार वाहन कायदा कलम १८४,१३४ब प्रमाणे गुन्हा दाखल करण्यात आला आहे.. तपास पोलीस अधीक्षक एम.राजकुमार, अपर पोलीस अधीक्षक चंद्रकांत गवळी, पोलीस उपअधीक्षक कृष्णात पिंगळे यांच्या मार्गदर्शनाखाली पोलीस उपनिरीक्षक गणेश सायकर करीत आहेत.