आर. सी. पटेल विद्यालयाचे शिक्षक श्रीकांत पंडित यांना राज्यस्तरीय ‘आदर्श शिक्षक सेवा सन्मान’ जाहीर
शिरपूरदि.१५ (प्रतिनिधी):येथील आर. सी. पटेल प्राथमिक विद्यालय, वाल्मिक नगर येथे कार्यरत असलेले शिक्षक श्री. श्रीकांत विजय पंडित यांच्या शैक्षणिक क्षेत्रातील समर्पित कार्याचा गौरव करण्यात आला आहे. शिक्षक फाऊंडेशन महाराष्ट्र राज्य व महाराष्ट्र शिक्षण पॅनल (MSP) यांच्या वतीने दिला जाणारा प्रतिष्ठित ‘राज्यस्तरीय आदर्श शिक्षक सेवा सन्मान’ त्यांना शिर्डी येथे प्रदान करण्यात आला.
दिग्गजांच्या हस्ते गौरव:
शिर्डी येथे १२ मे रोजी आयोजित एका विशेष सोहळ्यात, सुप्रसिद्ध मराठी अभिनेत्री भार्गवी चिरमुले यांच्या हस्ते आणि प्रसिद्ध कवी रोहित शिंगे यांच्या प्रमुख उपस्थितीत श्री. पंडित यांनी हा पुरस्कार आपल्या पत्नीसह स्वीकारला.
व्यासपीठावरील उपस्थिती:
या गौरव सोहळ्याला महाराष्ट्र शिक्षण पॅनलचे अध्यक्ष दीपक चामे, राज्य समन्वयक भास्कर डोसे, श्रीमती गुंजन पाटील यांसह शिक्षण आणि सांस्कृतिक क्षेत्रातील मान्यवर मोठ्या संख्येने उपस्थित होते.
कार्याचा गौरव:
शिक्षण क्षेत्रातील नाविन्यपूर्ण प्रयोग, विद्यार्थ्यांमधील गुणवत्ता वाढवण्यासाठी केलेले प्रयत्न आणि सामाजिक बांधिलकी म्हणून केलेल्या कार्याची दखल घेऊन श्रीकांत पंडित यांची या पुरस्कारासाठी निवड करण्यात आली.
अभिनंदनाचा वर्षाव:
श्रीकांत पंडित यांना मिळालेल्या या पुरस्कारामुळे शिरपूर एज्युकेशन सोसायटीचे पदाधिकारी, मुख्याध्यापक, शिक्षक सहकारी आणि वाल्मिक नगर परिसरातील पालकांनी त्यांचे अभिनंदन केले आहे. हा पुरस्कार म्हणजे शिरपूरच्या शैक्षणिक गुणवत्तेवर पडलेली मानाची मोहोर असल्याची भावना व्यक्त होत आहे.
"हा पुरस्कार माझ्या एकट्याचा नसून माझ्या शाळेतील विद्यार्थी आणि सहकाऱ्यांच्या प्रेमाचे प्रतीक आहे. यामुळे भविष्यात अधिक जोमाने काम करण्याची प्रेरणा मिळाली आहे."
— श्री. श्रीकांत पंडित