चापरने वार करून दगडाने ठेचले.. प्रेम संबंधाने "अनिकेत"च्या जीवावर बेतले..!

 

चापरने वार करून दगडाने ठेचले..  प्रेम संबंधाने "अनिकेत"च्या जीवावर बेतले..!

जळगाव (प्रतिनिधी):शहरातील पिंप्राळा रेल्वेेगेट  जवळील मालधक्क्यावर तरुणावर चॉपरने वार करुन त्याच्या डोक्यात दगड टाकून त्याचा निर्घृण खून केल्याची घटना मंगळवारी मध्यरात्री 1.30 वाजेच्या सुमारास घडली. या घटनेमुळे जळगाव शहरात खळबळ उडाली आहे. आनंद उर्फ अनिकेत गणेश गायकवाड (वय-21, रा. राजमालतीनगर) असे मयत तरुणाचे नाव असून याप्रकरणी शहर पोलिसात खूनाचा गुन्हा दाखल करण्यात आला आहे.

शहरातील दूध फेडरेशनजवळील राजमालती नगरात अनिकेत गायकवाड हा तरुण कुटुंबियांसह वास्तव्यास होता. मंगळवारी तो एका ठिकाणी हळदीच्या कार्यक्रमाला गेला. यावेळी त्याला सागर सामुद्रे व सुमित शेजवळ यांनी त्याला फोन करुन मालधक्क्यावर बोलावून घेतले. दरम्यान, त्यांनी एका हॉटेलातून दारु विकत घेवून ते तिघ मालधक्क्यावर दारु पिण्यासाठी बसले.याठिकाणी सागर याचे अनिकेतच्या मित्राच्या बहिणीसोबत प्रेमसंबंध होते. याबाबत अनिकेतने त्याच्या मित्राला सांगितल्याचा राग मनात ठेवत सागरने त्याच्यासोबत वाद घातला. वाद विकोपाला जात असल्याने दोघांनी त्याच्या डोळ्यात मिरचीची पूड टाकून त्याच्यावर चॉपरने वार केले. यात गंभीर जखमी झालेला अनिकेत जमिनीवर कोसळताच सागर व सुमितने त्याठिकाणावरील दगड अनिकेतच्या डोक्यात घातला. यामुळे त्याचा जागीच मृत्यू झाला.

दरम्यान, अनिकेतच्या कुटुंबियांनी त्याच्या कपडयावरुन त्याची ओळख पटविल्यानंतर पोलिसांनी त्याचा मृतदेह शवविच्छेदनासाठी शासकीय रुग्णालयात दाखल केला. याप्रकरणी शहर पोलिसात दोन जणांविरुद्ध गुन्हा दाखल करण्यात आला आहे. दरम्यान, संशयित सागर बाळू सामुद्रे (वय- 19, रा. राजमालती नगर) व सुमित संजय शेजवळ (वय- 18, रा. पिंप्राळा हुडको) या दोघांना स्थानिक गुन्हे शाखेच्या पथकाने मध्यरात्रीच अटक केली.