"एक वाढदिवस... दोन वृक्ष... हरित भविष्यासाठी सत्रासेन आश्रम शाळेचा अनोखा संकल्प"
सत्रासेन, ता. चोपडा,दि.८ (प्रतिनिधी) :"झाडे लावा, झाडे जगवा; निसर्गाशी नाते जपा" या संदेशाला कृतीची जोड देत धनाजी नाना प्राथमिक व डी.आर.बी. माध्यमिक व उच्च माध्यमिक आश्रम शाळा, सत्रासेन येथे गांधी रिसर्च फाउंडेशन, जळगाव यांच्या सहकार्याने वृक्षारोपणाचा प्रेरणादायी उपक्रम उत्साहात पार पडला. पर्यावरण संवर्धनाबरोबरच "वाढदिवसाला दोन वृक्ष लावायचे आणि त्यांचे संगोपन करायचे" हा अभिनव संकल्प यावेळी सुरू करण्यात आला.
"वृक्षवल्ली आम्हा सोयरे वनचरे" या संत तुकाराम महाराजांच्या अमर वचनाप्रमाणे प्रत्येक वृक्ष हा भविष्यातील जीवनाचा श्वास आहे, या भावनेतून कार्यक्रमाची सुरुवात करण्यात आली. यापूर्वी संस्थेचे अध्यक्ष श्री. रवींद्र रायसिंग भादले यांनी स्वखर्चाने उपलब्ध करून दिलेल्या शंभर वृक्षांची अजितदादा पवार यांच्या जयंतीनिमित्त शतवृक्ष लागवड करण्यात आली होती. त्या हरित अभियानाला पुढे नेत गांधी रिसर्च फाउंडेशन, जळगाव यांनी दिलेल्या वृक्षांमुळे पर्यावरण संवर्धनाच्या उपक्रमाला नवी ऊर्जा मिळाली.
या कार्यक्रमाला गांधी रिसर्च फाउंडेशनचे प्रतिनिधी श्री. चंद्रकांत चौधरी सर प्रमुख उपस्थित होते. संस्थेचे सचिव श्री. ज्ञानेश्वर रायसिंग भादले यांच्या हस्ते वृक्षारोपण करून कार्यक्रमाची सुरुवात झाली. त्यानंतर वाढदिवस असलेले शिक्षक श्री. योगेश ईश्वरलाल पाटील आणि श्री. विकास रामदास पाटील यांनी प्रत्येकी दोन वृक्ष लावून त्यांच्या संगोपनाची जबाबदारी स्वीकारली. यापुढे शाळेतील प्रत्येक शिक्षक आपल्या वाढदिवसानिमित्त किमान दोन वृक्ष लावून त्यांचे संगोपन करणार असल्याचा अभिनव निर्णय यावेळी घेण्यात आला. विद्यार्थ्यांनीही या उपक्रमाला उत्स्फूर्त प्रतिसाद देत पर्यावरण संरक्षणाची सामूहिक शपथ घेतली.
यावेळी उपस्थित मान्यवरांनी मार्गदर्शन करताना सांगितले की, महात्मा गांधी यांनी दिलेला ग्रामस्वच्छता, पर्यावरण संवर्धन आणि शाश्वत विकासाचा संदेश आजही तितकाच प्रेरणादायी आहे. गांधी रिसर्च फाउंडेशन, जळगाव हे महात्मा गांधींच्या विचारांचा प्रसार, शाश्वत शेती, पर्यावरण संवर्धन, ग्रामीण विकास, शिक्षण आणि सामाजिक जनजागृती यासाठी सातत्याने कार्यरत असलेली एक प्रतिष्ठित संस्था असून त्यांच्या सहकार्यामुळे हा उपक्रम अधिक अर्थपूर्ण ठरला.
कार्यक्रमाचे प्रभावी सूत्रसंचालन भालचंद्र शिवाजी पवार यांनी केले.या उपक्रमाच्या यशस्वीतेसाठी संस्थेचे अध्यक्ष श्री. रवींद्र रायसिंग भादले, सचिव श्री. ज्ञानेश्वर रायसिंग भादले, प्राथमिक विभागाचे मुख्याध्यापक श्री. डी. पी. पावरा, माध्यमिक विभागाच्या मुख्याध्यापिका सौ. वंदना सरदार पावरा यांच्या मार्गदर्शनाखाली दीपमाला भादले, कैलास शालिग्राम महाजन, संजय धोंडू शिरसाळे, गजानन पाटील, मनोज पाटील, नरेंद्र देसले, योगेश पाटील, झेड. एच. करकाळे, अधिक भादले, सुधाकर महाजन, उदय वानखेडे, विकास पाटील, विकास कोळी, अजय पावरा, पवन पावरा, कल्पना पाटील, सरोजनी चौधरी, वैशाली अजगे, मनीषा भादले, मनोज साळुंखे, अनिल राणे, शीतल पाटील, मनोज महाजन, योगेश गांगुर्डे, गणेश शिंदे, नरेंद्र महाजन तसेच शिक्षकेतर कर्मचारी आणि वस्तीगृह विभागातील कर्मचाऱ्यांनी विशेष परिश्रम घेतले.
कार्यक्रमास विद्यार्थी, शिक्षक आणि कर्मचारी यांची उत्स्फूर्त उपस्थिती लाभली. "आजचे एक रोपटे म्हणजे उद्याच्या पिढीसाठी दिलेला प्राणवायूचा अमूल्य ठेवा" हा संदेश देत पर्यावरण संवर्धनाची सामूहिक जबाबदारी स्वीकारण्याचे आवाहन करण्यात आले.
गांधी रिसर्च फाउंडेशन, जळगावचे पदाधिकारी, श्री. चंद्रकांत चौधरी सर तसेच संस्थेचे अध्यक्ष श्री. रवींद्र रायसिंग भादले आणि सचिव श्री. ज्ञानेश्वर रायसिंग भादले यांचे शाळा परिवारातर्फे मनःपूर्वक आभार व्यक्त करण्यात आले. त्यांच्या सहकार्यामुळे शाळेच्या हरित अभियानाला नवी दिशा आणि नवी प्रेरणा मिळाल्याची भावना यावेळी व्यक्त करण्यात आली.